Saesneg / English

Saesneg / English

  • enquiries@penycymoeddcic.cymru
  • Ffon: 01685 878785
Gwneud cais am Gyllid$Gwybodaeth am y Gronfa$

Gwneud cais am Gyllid

Gwybodaeth am y Gronfa

Cronfa Gymunedol Pen y Cymoedd yn dyfarnu £25,672.83 i ysbrydoli gyrfaoedd gwyrdd y dyfodol drwy “Turbine Time!”

Mehefin

Mae Cronfa Gymunedol Pen y Cymoedd yn falch o ddyfarnu £25,672.83 i EESW STEM Cymru i gyflwyno “Turbine Time! – Addysg wedi’i Bweru gan Wynt” mewn ysgolion ar draws ardal y Gronfa.

Bydd y rhaglen gyffrous hon yn rhoi cyfle i gannoedd o bobl ifanc archwilio ynni adnewyddadwy, peirianneg a chynaliadwyedd amgylcheddol drwy weithgareddau ymarferol sy’n gysylltiedig yn uniongyrchol â fferm wynt Pen y Cymoedd.

Dros flwyddyn academaidd 2026–2027, bydd tua 720 o ddisgyblion o oddeutu 18 ysgol ar draws Castell-nedd Port Talbot a Rhondda Cynon Taf yn cymryd rhan mewn ymchwiliadau ymarferol, heriau peirianneg a phrosiectau ynni adnewyddadwy yn seiliedig ar sefyllfaoedd go iawn, gan gysylltu dysgu â gyrfaoedd y dyfodol.

Bydd disgyblion yn adeiladu ac yn profi tyrbinau gwynt model, yn ymchwilio i weld a allai eu hysgol eu hunain gael ei phweru gan ynni gwynt, yn dadansoddi data amgylcheddol ac yn cyflwyno casgliadau seiliedig ar dystiolaeth drwy gyflwyniadau, adroddiadau a chyfryngau digidol.

Yn bwysig, mae’r rhaglen yn mynd y tu hwnt i ddysgu yn yr ystafell ddosbarth drwy helpu pobl ifanc i ddeall y cyfleoedd sy’n dod i’r amlwg o fewn y sector ynni adnewyddadwy sy’n tyfu ar garreg eu drws. Trwy ymgysylltu â gweithwyr proffesiynol yn y diwydiant a gweithgareddau sy’n gysylltiedig yn uniongyrchol â fferm wynt Pen y Cymoedd, bydd disgyblion yn cael cipolwg ar yrfaoedd mewn peirianneg, ynni, cynaliadwyedd a thechnoleg.

Mae’r prosiect hefyd yn anelu at gryfhau cysylltiad pobl ifanc â’u hamgylchedd lleol a chynyddu ymwybyddiaeth o sut mae ynni adnewyddadwy yn cyfrannu at lesiant cymunedol a dyfodol carbon isel Cymru.

Mae’r fenter yn cefnogi blaenoriaethau allweddol Gweledigaeth Gymunedol Pen y Cymoedd o ran ysgolion a hyfforddiant, sgiliau a chyflogaeth, ac ymwybyddiaeth amgylcheddol. Mae hefyd yn sicrhau bod gan ysgolion adnoddau ac offer y gellir eu hailddefnyddio, gan greu etifeddiaeth barhaus y tu hwnt i oes y prosiect.

Disgwylir i’r gwaith ddechrau yn hydref 2026 a pharhau tan fis Gorffennaf 2027.

Sefydlwyd y gronfa gan y cwmni ynni Vattenfall i fod o fudd i’r cymunedau sy’n lletya fferm wynt Pen y Cymoedd ar draws rhannau uchaf Cymoedd Nedd, Afan, Rhondda a Chynon. Mae’n bodoli gyda’r nod o gefnogi pobl, grwpiau a sefydliadau lleol i fuddsoddi ynddynt eu hunain, yn eu syniadau ac yn eu cymunedau.
 
Mae gan y Gronfa Gymunedol gyllideb flynyddol sylweddol sy’n fynegrifol, ac felly’n cynyddu yn unol â chwyddiant. Er enghraifft, roedd hyn yn cyfateb i tua £2.5 miliwn yn 2025. Bydd y Gronfa’n parhau i gefnogi cymunedau hyd at 2043, gan greu cyfleoedd hir-dymor ar gyfer twf, gwydnwch a newid cadarnhaol.
 
Rheolir y Gronfa gan Gwmni Buddiant Cymdeithasol (CIC) nid-er-elw sy’n annibynnol ac wedi’i leoli’n lleol. Caiff ei goruchwylio gan Fwrdd o Gyfarwyddwyr a chanddynt gysylltiadau lleol cryf, a’i darparu gan dîm bychan o staff ymroddedig sydd â phrofiad eang o ymgysylltu â chymunedau. Rydym ni yma i helpu’r Gronfa i sicrhau ei bod yn gwireddu gweledigaeth a blaenoriaethau’r cymunedau lleol.
 
Dros y 10 mlynedd nesaf, mae’r Gronfa’n bwriadu ffocysu ar fuddsoddi mewn pobl, lleoliadau a busnesau – gan helpu’r Cymoedd i ffynnu, annog syniadau mentrus, cefnogi trawsnewid, a chreu effaith barhaus ar gyfer y genhedlaeth hon a chenedlaethau’r dyfodol.
Yn ôl i newyddion