Saesneg / English

Saesneg / English

  • enquiries@penycymoeddcic.cymru
  • Ffon: 01685 878785
Gwneud cais am Gyllid$Gwybodaeth am y Gronfa$

Gwneud cais am Gyllid

Gwybodaeth am y Gronfa

Cronfa Gymunedol Fferm Wynt Pen y Cymoedd yn dyfarnu £24,900 i Cymoedd Creadigol CIC ar gyfer prosiect treftadaeth arloesol

Medi 16

Mae Cronfa Gymunedol Fferm Wynt Pen y Cymoedd yn falch o ddyfarnu £24,900 i Cymoedd Creadigol CIC i gefnogi’r gwaith o gyflwyno Twn Pychs, prosiect creadigol uchelgeisiol dan arweiniad y gymuned a fydd yn dathlu ac yn diogelu treftadaeth fyw cymoedd Rhondda a Chynon Uchaf.

Bydd Twn Pychs yn rhedeg dros gyfnod o 18 mis ac yn dod â phobl o bob oed ynghyd drwy raglen o weithdai am ddim sy’n canolbwyntio ar greadigrwydd digidol, celf a chrefftau traddodiadol,

hanes lleol, adrodd straeon a’r Gymraeg. Bydd cyfranogwyr yn cael cyfle i ddysgu sgiliau gan gynnwys creu fideos, recordio hanes llafar, sganio 3D, ymchwilio i archifau a dylunio gemau, wrth gofnodi’r straeon, atgofion, tirweddau a thraddodiadau sy’n gwneud eu cymunedau’n unigryw.

Mae’r prosiect yn adeiladu ar lwyddiant prosiect peilot a gefnogwyd drwy Gronfa Micro Pen y Cymoedd, gan ymateb i alw cryf gan y gymuned am gyfleoedd sy’n cyfuno creadigrwydd, treftadaeth a sgiliau digidol.

Un o nodweddion unigryw Twn Pychs yw y bydd y deunydd a grëir gan gyfranogwyr — gan gynnwys hanesion llafar, ffilmiau, gwaith celf, sganiau 3D a chynnwys Cymraeg — yn cael ei drawsnewid yn gêm fideo byd agored ryngweithiol, gan greu archif ddigidol fyw o dreftadaeth ddiwylliannol yr ardal. Bydd y prosiect hefyd yn cynhyrchu ffilm ddogfen ac yn dod i ben gyda digwyddiad arddangos cyhoeddus yn Theatr Parc a Dare yn Nhreorci.

Yn ogystal â diogelu treftadaeth leol, nod y prosiect yw gwella llesiant, lleihau unigedd cymdeithasol, cryfhau cysylltiadau rhwng cenedlaethau a rhoi sgiliau creadigol a digidol gwerthfawr i gyfranogwyr a all gefnogi dysgu, gwirfoddoli a chyflogaeth yn y dyfodol.

Mae Cronfa Gymunedol Fferm Wynt Pen y Cymoedd yn falch o gefnogi prosiectau fel Twn Pychs sy’n dathlu hunaniaeth leol, yn buddsoddi mewn pobl ac yn creu manteision hirdymor i gymunedau ledled ardal y Gronfa. Edrychwn ymlaen at weld y prosiect yn datblygu a’r effaith gadarnhaol y bydd yn ei chael ledled cymoedd Rhondda a Chynon.

“Ar ôl prosiect peilot llwyddiannus iawn, rydym yn gyffrous i allu ehangu Twn Pychs a gweithio gyda mwy o gymunedau ledled cymoedd Rhondda a Chynon Uchaf. Mae hon yn ffordd wirioneddol newydd o brofi treftadaeth fyw leol a chofnodi straeon ac atgofion cyn iddynt gael eu colli am byth. Os hoffai unrhyw bobl neu grwpiau gymryd rhan, boed hynny drwy greu fideos, ymchwilio i hanes lleol, dylunio gemau neu ddim ond archwilio’r ardal, byddem wrth ein bodd yn clywed gennych!” — Cymoedd Creadigol CIC

Sefydlwyd y gronfa gan y cwmni ynni Vattenfall i fod o fudd i’r cymunedau sy’n lletya fferm wynt Pen y Cymoedd ar draws rhannau uchaf Cymoedd Nedd, Afan, Rhondda a Chynon. Mae’n bodoli gyda’r nod o gefnogi pobl, grwpiau a sefydliadau lleol i fuddsoddi ynddynt eu hunain, yn eu syniadau ac yn eu cymunedau.
 
Mae gan y Gronfa Gymunedol gyllideb flynyddol sylweddol sy’n fynegrifol, ac felly’n cynyddu yn unol â chwyddiant. Er enghraifft, roedd hyn yn cyfateb i tua £2.5 miliwn yn 2025. Bydd y Gronfa’n parhau i gefnogi cymunedau hyd at 2043, gan greu cyfleoedd hir-dymor ar gyfer twf, gwydnwch a newid cadarnhaol.
 
Rheolir y Gronfa gan Gwmni Buddiant Cymdeithasol (CIC) nid-er-elw sy’n annibynnol ac wedi’i leoli’n lleol. Caiff ei goruchwylio gan Fwrdd o Gyfarwyddwyr a chanddynt gysylltiadau lleol cryf, a’i darparu gan dîm bychan o staff ymroddedig sydd â phrofiad eang o ymgysylltu â chymunedau. Rydym ni yma i helpu’r Gronfa i sicrhau ei bod yn gwireddu gweledigaeth a blaenoriaethau’r cymunedau lleol.
 
Dros y 10 mlynedd nesaf, mae’r Gronfa’n bwriadu ffocysu ar fuddsoddi mewn pobl, lleoliadau a busnesau – gan helpu’r Cymoedd i ffynnu, annog syniadau mentrus, cefnogi trawsnewid, a chreu effaith barhaus ar gyfer y genhedlaeth hon a chenedlaethau’r dyfodol.
Yn ôl i newyddion