CÔR MENYWOD DARE TO SING – YMLAEN AC I FYNY
CRONFA GRANTIAU BYCHAIN – £1,720.00
Sefydlwyd Côr Merched Dare to Sing yn 2015 yng Nghwmdâr ac erbyn hyn mae mwy nag 80 o aelodau. Gofynnwyd i aelodau beth maent yn ei fwynhau am y côr, ac roedd y sylwadau a gyflwynwyd gyda’r cais yn deimladwy:
– Fel llawer o’r menywod, wedi bod drwy ganser, pan rydych chi’n canu dydych chi ddim yn meddwl am ddim byd, mae mor bositif.
Y peth gorau y gallaswn fod wedi’i wneud ar ôl colli fy ngŵr oedd ymuno â’r côr, mae wedi fy helpu i ddod trwy adeg anodd iawn.
– Rwyf wedi bod wrth fy modd yn cael bod yn aelod o’r côr o’r diwrnod cyntaf, ond wnes i fyth ddychmygu y byddai’n rhoi’r fath ymdeimlad o falchder, boddhad a pherthyn i mi.
Roedd y cais yn seiliedig ar dystiolaeth a ystyriwyd yn dda a gwnaed dyfarniad rhannol ar gyfer costau cyfrifiadur ac offer sain.
“Mae’r gliniadur wedi bod yn fendith ac mae’r system gyfrifyddu a osodwyd wedi helpu’r trysorydd ac yn gyffredinol mae’r holl gofnodion, gwaith papur a chofnodion aelodaeth nawr yn ddiogel a wedi’u cofnodi yn gywir. Rydym wrthi’n sganio yr holl bosteri archif, rhaglenni a lluniau archif a bydd hyn yn ei wneud yn llawer haws cynhyrchu cylchlythyrau a deunydd hyrwyddo a sicrhau bod gwybodaeth y grŵp yn ddiogel ac ar gael waeth pwy yw aelodau’r pwyllgor yn y dyfodol. Mae ein repertoire yn tyfu a gydag 83 o aelodau mae chwyddseinydd yn hanfodol i ganiatáu inni glywed y bysellfwrdd a datblygu ac ehangu ein perfformiadau. Weithiau, y pethau bach sy’n gwneud gwahaniaeth mawr – roedd cael meicroffon ar gael wrth geisio trefnu 83 o fenywod yn dimau cwis mewn digwyddiad cymdeithasol yn amhrisiadwy! Wrth gyflwyno cais am grant ac yna prynu a gosod offer sylweddolasom fod angen prosesau cryfach ac felly recriwtiwyd 5 aelod newydd i’r pwyllgor. Rydym mor falch o fod wedi cael y grant a bydd y côr yn mynd o nerth i nerth.” Chris Harrison Côr Menywod Dare To Sing
Sut wnaeth y prosiect hwn fodloni blaenoriaethau’r gronfa:
Annog cyfranogiad mewn gweithgareddau diwylliannol / darparu offer cerddorol ar gyfer grwpiau sefydledig / cefnogi gweithgarwch diwylliannol ysbryd cymunedol
Sefydlwyd y gronfa gan y cwmni ynni Vattenfall i fod o fudd i’r cymunedau sy’n lletya fferm wynt Pen y Cymoedd ar draws rhannau uchaf Cymoedd Nedd, Afan, Rhondda a Chynon. Mae’n bodoli gyda’r nod o gefnogi pobl, grwpiau a sefydliadau lleol i fuddsoddi ynddynt eu hunain, yn eu syniadau ac yn eu cymunedau.
Mae gan y Gronfa Gymunedol gyllideb flynyddol sylweddol sy’n fynegrifol, ac felly’n cynyddu yn unol â chwyddiant. Er enghraifft, roedd hyn yn cyfateb i tua £2.5 miliwn yn 2025. Bydd y Gronfa’n parhau i gefnogi cymunedau hyd at 2043, gan greu cyfleoedd hir-dymor ar gyfer twf, gwydnwch a newid cadarnhaol.
Rheolir y Gronfa gan Gwmni Buddiant Cymdeithasol (CIC) nid-er-elw sy’n annibynnol ac wedi’i leoli’n lleol. Caiff ei goruchwylio gan Fwrdd o Gyfarwyddwyr a chanddynt gysylltiadau lleol cryf, a’i darparu gan dîm bychan o staff ymroddedig sydd â phrofiad eang o ymgysylltu â chymunedau. Rydym ni yma i helpu’r Gronfa i sicrhau ei bod yn gwireddu gweledigaeth a blaenoriaethau’r cymunedau lleol.
Dros y 10 mlynedd nesaf, mae’r Gronfa’n bwriadu ffocysu ar fuddsoddi mewn pobl, lleoliadau a busnesau – gan helpu’r Cymoedd i ffynnu, annog syniadau mentrus, cefnogi trawsnewid, a chreu effaith barhaus ar gyfer y genhedlaeth hon a chenedlaethau’r dyfodol.