Saesneg / English

Saesneg / English

  • enquiries@penycymoeddcic.cymru
  • Ffon: 01685 878785
Gwneud cais am Gyllid$Gwybodaeth am y Gronfa$

Gwneud cais am Gyllid

Gwybodaeth am y Gronfa

£16,500 wedi’i ddyfarnu i Bee1 Community ar gyfer Pollinator Patch Challenge

Rydym yn falch iawn o gyhoeddi bod Bee1 Community wedi derbyn £16,500 i gyflwyno ei brosiect ysbrydoledig Pollinator Patch Challenge ar draws ardal Pen y Cymoedd.

Bydd y prosiect yn galluogi ysgolion, trigolion a busnesau lleol i ddylunio a chreu mannau gwyrdd sy’n gyfeillgar i beillwyr – o ddarnau bach o erddi i gynefinoedd cymunedol mwy – gan helpu i wrthdroi colled bioamrywiaeth tra’n gwella mynediad at natur a chefnogi llesiant cymunedol. Bydd cyfranogwyr yn cael eu harwain drwy weithdai ymarferol, cyngor ymarferol, pecynnau hadau, a llwyfan dysgu digidol am ddim sy’n cynnwys gwersi rhyngweithiol, adnoddau STEM, ac offer i archwilio a monitro bioamrywiaeth leol.

Mae dull Bee1 yn ymateb i’r angen brys i ddiogelu peillwyr, sydd mewn dirywiad sylweddol oherwydd colli cynefinoedd, defnydd plaladdwyr, newid hinsawdd a chlefydau. Mae ymchwil yn dangos y gall hyd yn oed ardaloedd bach o flodau gwyllt gael effaith amgylcheddol bwerus, gan gefnogi lefelau llawer uwch o fioamrywiaeth planhigion a di-asgwrn-cefn o gymharu â lawntiau glaswellt traddodiadol.

Nod y prosiect yw ymgysylltu tua 40 o ysgolion a thua 8,000 o ddisgyblion ar draws y rhanbarth, ynghyd â thrigolion a busnesau. Bydd yn darparu adnoddau dysgu am ddim sy’n gysylltiedig â’r cwricwlwm, yn annog dysgu awyr agored ac ymgysylltu STEM, ac yn hyrwyddo gweithredu cadarnhaol hirdymor dros natur.

Fel y mae Bee1 yn esbonio:

“Mae’r Pollinator Patch Challenge yn ymwneud â chael pobl leol i ddylunio a chreu gofod gwyrdd sy’n gyfeillgar i beillwyr, pa mor fawr neu fach bynnag ydyw, i annog peillwyr a bioamrywiaeth yn yr ardal, ynghyd â chael pobl allan i fyd natur i gefnogi llesiant.”

Bydd y fenter gyffrous hon yn helpu i greu mwy o fannau sy’n gyfeillgar i fywyd gwyllt ar draws Pen y Cymoedd, cryfhau cysylltiadau cymunedol, gwella llesiant drwy weithgareddau sy’n seiliedig ar natur, ac ysbrydoli gweithredu parhaol i ddiogelu bioamrywiaeth ar gyfer cenedlaethau’r dyfodol.

Sefydlwyd y gronfa gan y cwmni ynni Vattenfall i fod o fudd i’r cymunedau sy’n lletya fferm wynt Pen y Cymoedd ar draws rhannau uchaf Cymoedd Nedd, Afan, Rhondda a Chynon. Mae’n bodoli gyda’r nod o gefnogi pobl, grwpiau a sefydliadau lleol i fuddsoddi ynddynt eu hunain, yn eu syniadau ac yn eu cymunedau.
 
Mae gan y Gronfa Gymunedol gyllideb flynyddol sylweddol sy’n fynegrifol, ac felly’n cynyddu yn unol â chwyddiant. Er enghraifft, roedd hyn yn cyfateb i tua £2.5 miliwn yn 2025. Bydd y Gronfa’n parhau i gefnogi cymunedau hyd at 2043, gan greu cyfleoedd hir-dymor ar gyfer twf, gwydnwch a newid cadarnhaol.
 
Rheolir y Gronfa gan Gwmni Buddiant Cymdeithasol (CIC) nid-er-elw sy’n annibynnol ac wedi’i leoli’n lleol. Caiff ei goruchwylio gan Fwrdd o Gyfarwyddwyr a chanddynt gysylltiadau lleol cryf, a’i darparu gan dîm bychan o staff ymroddedig sydd â phrofiad eang o ymgysylltu â chymunedau. Rydym ni yma i helpu’r Gronfa i sicrhau ei bod yn gwireddu gweledigaeth a blaenoriaethau’r cymunedau lleol.
 
Dros y 10 mlynedd nesaf, mae’r Gronfa’n bwriadu ffocysu ar fuddsoddi mewn pobl, lleoliadau a busnesau – gan helpu’r Cymoedd i ffynnu, annog syniadau mentrus, cefnogi trawsnewid, a chreu effaith barhaus ar gyfer y genhedlaeth hon a chenedlaethau’r dyfodol.
Yn ôl i newyddion